Միջազգային ուշադրությունը Հարավային Կովկասից աստիճանաբար շեղվելով, մի հարց մնում է խիստ մտահոգիչ մարդու իրավունքների պաշտպանների համար։ Դա Ադրբեջանում ապօրինաբար պահվող հայ գերիների ճակատագիրն է՝ ինչպես քաղաքացիական անձանց, այնպես էլ նախկին զինծառայողների, ովքեր գերեվարվել են 2023 թ աշնանը Ադրբեջանի իրականացրած ռազմական գործողություններից հետո։ Այս հրեշավոր իրավիճակը փոխելու համար «Հայ Դատի» կենտրոնական գրասենյակը կազմել է Եվրոպայի անվտանգության և համագործակցության կազմակերպությանը (ԵԱՀԿ) ուղղված ծավալուն ստորագրահավաք՝ խնդրագիր, Ադրբեջանի վրա ճնշում գործադրելու և այդ երկրում հետաքննություն անցկացնելու նպատակով «Մոսկվայի մեխանիզմը» ակտիվացնելու համար ։ Մինչ օրս խնդրագրի տակ ստորագրությունների թիվը հասել է 3807-ի, մինչդեռ նախատեսված նպատակը 5500 էր։ Այլ կերպ ասած՝ գրեթե 70 տոկոսն արդեն ապահովված է։
Ադրբեջանը ԵԱՀԿ լիիրավ անդամ է և պարտավոր է հարգել մարդու հիմնարար իրավունքներն ու ազատությունները։ Սակայն, ինչպես պնդում են ստորագրահավաքի նախաձեռնողները, հայազգի գերիների նկատմամբ վարվող քաղաքականությունը՝ մասնավորապես Արցախի՝ Լեռնային Ղարաբաղի, նախկին բնակչության ներկայացուցիչների նկատմամբ, բացահայտորեն հակասում է այդ սկզբունքներին։
Նախադեպ գոյություն ունի. Մոսկվայի մեխանիզմը
Ինչպես նշեցինք, ստորագրահավաքը՝ հասցեագրված ԵԱՀԿ բարձրաստիճան պաշտոնյաներին, կոչ է անում գործի դնել Մոսկվայի փաստաթղթի Մոսկվայի մեխանիզմը։ Այն ընդունվել է 1991 թ և թույլ է տալիս անկախ փորձագիտական առաքելություն ուղարկել որևէ անդամ պետություն՝ մարդու իրավունքների ծանր խախտումները փաստելու և համապատասխան հանձնարարականներ մշակելու նպատակով։
Մեխանիզմի կիրառման համար անհրաժեշտ է առնվազն տասը ԵԱՀԿ անդամ պետության նախաձեռնությունը։ Այդ դեպքում ստեղծվում է անկախ փորձագիտական խումբ, որը կարող է այցելել տվյալ երկիր, փաստահավաք աշխատանք իրականացնել և զեկույց հրապարակել՝ իրավական և քաղաքական գնահատականներով։
Վերջին տարիներին Մոսկվայի մեխանիզմը կիրառվել է մի շարք ճգնաժամային իրավիճակներում, մասնավորապես Ուկրանիայում և Բելառուսում, ապացուցելով իր արդյունավետությունն այն դեպքերում, երբ ներպետական արդարադատությունը խաթարված է կամ կողմնակալ։
Ստորագրահավաքի հեղինակները վստահ են՝ Ադրբեջանում ստեղծված իրավիճակը միանշանակորեն համապատասխանում է նման միջամտության պայմաններին։ «Հայ դատի հանձնախմբերի ու գրասենյակների աշխարհասփյուռ ցանցի աշխատանքի լեգիտիմության, անխոցելիության ու հաջողությունների հիմքը հայ ժողովուրդն է», — նշում են ստորագրահավաքի նախաձեռնողները։ «Մեր արածը հաճախ այլ բան չէ, քան մեր ժողովրդի քաղաքական պահանջների արտահայտումն ու դրան համապատասխան հարաբերական աշխատանք իրականացնելը։ Որպես կանոն, յուրաքանչյուր կարևոր ձեռնարկից առաջ Հայ դատի հանձնախմբերը դիմում են համայնքներին՝ վերջիններիս զորակցությունը ստանալու համար։ Այժմ Հայ դատի կենտրոնական գրասենյակն է դիմում մեր ժողովրդին՝ Հայրենիքում և սփյուռքում.
Սիրելի՛ հայրենակիցներ, Ադրբեջանում ապօրինի պահվող հայ մեր գերիների ազատ արձակման հնարավորությունը, կեղծ դատավարական գործընթացների արդյունքում, անհնար է։ Ադրբեջանում ո՛չ արդարադատություն կա, ո՛չ՝ օրինականություն և ո՛չ էլ իրավունքի գերակայություն։ Այս պարագայում, Ադրբեջանի վրա միջազգային ճնշման շարունակական մեծացումը չափազանց կարևոր է։ Ուստի, ՀՅԴ Բյուրոյի Հայ Դատի Կենտրոնական Գրասենյակը մեկնարկել է առցանց խնդրագրի ստորագրման գործընթաց՝ ուղղված ԵԱՀԿ առանցքային պաշտոնյաներին», — բացատրում են ստորագրահավաքի կազմակերպիչները։
ԵԱՀԿ-ն ունի մի քանի գործիքներ, որոնց միջոցով հնարավոր է որևէ անդամ երկրում իրականացնել անկախ մասնագիտական փաստահավաք առաքելություն, ինչը, տվյալ դեպքում՝ Ադրբեջանի պարագայում, թույլ կտա մոնիթորինգի ենթարկել դատավարությունների օրինականությունը, հայ գերիների պահման պայմանները ու նրանց առողջական վիճակը, և հանդես գալ համապատասխան մասնագիտական անկախ դիրքորոշմամբ, ինչն էլ հետագայում հիմք կծառայի ԵԱՀԿ քաղաքական դիրքորոշման համար։
Ներկայումս, Հայ Դատի հանձնախմբերն ու գրասենյակներն աշխատանքներ են իրականացնում, որ ԵԱՀԿ պատկան մարմինները կարճ ժամանակահատվածում, համապատասխան ԵԱՀԿ 1991 թվականի Մոսկվայի մեխանիզմի, մասնագիտական փաստահավաք առաքելություն գործուղեն Բաքու։ Մինչ այժմ, ԵԱՀԿ Մոսկվայի մեխանիզմը նախընթաց գործադրման 19 փորձ ունի՝ տարբեր երկրներում։
Իր հերթին, Հայ Դատի կենտրոնական գրասենյակը հրապարակված խնդրագրով նախատեսում է հնարավորինս մեծ քանակի ստորագրություններ հավաքել՝ ուղղված ԵԱՀԿ համապատասխան պաշտոնյաներին», — ընդգծում են խնդրագրի նախաձեռնողները։
«ՈՒստի, խնդրո՛ւմ ենք, Հայ Դատի կենտրոնական գրասենյակի armeniancause.net կայքում կամ սույն հղումով ստորագրե՛լ խնդրագիրն ու ձեր ներդրում ունենալ արդարության մեր հավաքական արժանապատվության վերականգնման գործում։
ԵԱՀԿ-ն, որին, դեմս Մինսկի խմբի, մշտապես ընդունել է Արցախի ռազմաքաղաքական ղեկավարության լեգիտիմությունն ու վերջինիս հետ տասնամյակներ շարունակ բանակցություններ է վարել, չի կարող անմասն մնալ և հստակ դիրքորոշում չհայտնել՝ ԵԱՀԿ գործունեության տարածքում մարդու իրավունքների և կազմակերպության հիմնարար արժեքների այս կարևորագույն խախտումների վերաբերյալ։ Առաջիկա շաբաթների ընթացքում, Հայ դատի կենտրոնական գրասենյակը հասարակությանը պարբերաբար կիրազեկի այս գործընթացի արդյունքների վերաբերյալ», — հայտարարում են ստորագրահավաքի կազմակերպիչները։
Ժամանակն է, որ ԵԱՀԿ-ն գործի անցնի
Ստորագրահավաքի հեղինակները հստակ ուղերձ են հղում․ լռությունն այլևս արդարացու չէ։ Հայ գերիների համար ժամանակը որոշիչ է՝ կյանքի և մահվան հարց։ Իսկ միջազգային հանրության համար լռությունն այլևս չի կարող դիտարկվել որպես չեզոքություն։ Լռությունը համարվելու է մեղսակցություն։
Խոսքը նաև էթնիկ հիմքով հետապնդումների մասին է, որոնք դիտարկվում են որպես ատելության և խտրականության քաղաքականություն, և որոնք լիովին անհամատեղելի են հաշտության և կայուն խաղաղության որևէ հեռանկարի հետ։
Ովքե՞ր են Ադրբեջանում ապօրինաբար պահվող հայ գերիները
Ադրբեջանական կալանքի ներքո հյուծվող 23 հայ ձերբակալվածներից 8-ը Արցախի ռազմաքաղաքական ղեկավարության մասն են կազմում, 6-ը՝ գերեվարված քաղաքացիական անձինք են և 9-ը՝ հայ ռազմագերիներ։
Առկա է հայ բանտարկյալների ճակատագիրը Հայաստանի Հանրապետությունից խաղաղության բանակցությունների շրջանակներում պահանջած քաղաքական զիջումների հետ կապելու Ադրբեջանի ցինիկ մանևր՝ այս մարդկանց ներկայացնելով մի շարք լուրջ և անհեթեթ մեղադրանքներ։ Ըստ էության, նրանք բոլորն էլ պատանդ են, որոնց Բաքուն օգտագործում է այս կամ այն նպատակին հասնելու համար։
Քաղաքական բանտարկյալներ
Դավիթ Բաբայանը հայ քաղաքական և պետական գործիչ է, քաղաքագետ՝ պատմական գիտությունների դոկտորի կոչումով։
2021-2023 թվականներին նա զբաղեցրել է Արցախի Հանրապետության (Լեռնային Ղարաբաղի) արտաքին գործերի նախարարի պաշտոնը։ Ծնվել է 1973 թվականի ապրիլի 5-ին Ստեփանակերտում, Լեռնային Ղարաբաղի ինքնավար մարզում (ԽՍՀՄ), Արցախի պահպանողական կուսակցության հիմնադիր նախագահն է և ունի արտակարգ և լիազոր դեսպանի դիվանագիտական կոչում։
2023 թվականի սեպտեմբերի 28-ին նա պատանդ է վերցվել Ադրբեջանի իշխանությունների կողմից։
Դավիթ Իշխանյան
Դավիթ Իշխանյանը քաղաքական և պետական գործիչ է, որը զբաղեցրել է Արցախի Հանրապետության (Լեռնային Ղարաբաղի) Ազգային ժողովի նախագահի պաշտոնը 2023 թվականի օգոստոսից ի վեր՝ ադրբեջանական ագրեսիայից մեկ ամիս առաջ։
Դավիթ Իշխանյանը ծնվել է 1968 թվականի դեկտեմբերի 27-ին Լեռնային Ղարաբաղի Ինքնավար Մարզի (ԽՍՀՄ) Մարտունու շրջանի Աշան գյուղում։ Նախկինում նա զբաղեցրել է Լեռնային Ղարաբաղի Հանրապետության առաջին գումարման Գերագույն խորհրդի պատգամավորի պաշտոնը։ 2015 թվականին Դավիթ Իշխանյանն ընտրվել է Լեռնային Ղարաբաղի Հանրապետության Ազգային ժողովի անդամ։ Իշխանյանը Հայ Յեղափոխական Դաշնակցություն (ՀՅԴ) կուսակցության Բյուրոյի անդամ է։
2023 թվականի հոկտեմբերի 3-ին Դավիթ Իշխանյանը Ստեփանակերտում առևանգվել է ադրբեջանական զորքերի կողմից և տարվել Բաքու։
Արկադի Ղուկասյանը հայ քաղաքական և պետական գործիչ է, Արցախի Հանրապետության (Լեռնային Ղարաբաղի) երկրորդ նախագահը (1997-2007):
Արկադի Ղուկասյանը ծնվել է 1957 թվականի հունիսի 22-ին Լեռնային Ղարաբաղի Ինքնավար Մարզի (ԽՍՀՄ) Ստեփանակերտ քաղաքում։ Նա Լեռնային Ղարաբաղի Հանրապետության արտաքին գործերի նախարարն էր և ՀՀ նախագահի նախկին հատուկ հանձնարարություններով դեսպանը։
2023 թվականի հոկտեմբերի 3-ին Արկադի Ղուկասյանը Ստեփանակերտում առևանգվել է ադրբեջանական զորքերի կողմից և տարվել Բաքու։
Արայիկ Հարությունյանը հայ քաղաքական և պետական գործիչ է, Արցախի Հանրապետության (Լեռնային Ղարաբաղի) նախկին նախագահը (2020-2023 թթ):
Արայիկ Հարությունյանը ծնվել է 1973 թվականի դեկտեմբերի 14-ին, Լեռնային Ղարաբաղի ինքնավար մարզի (ԽՍՀՄ) Ստեփանակերտ քաղաքում։ Ունի տեխնիկական գիտությունների դոկտորի կոչում։ Նախկինում՝ Ազգային ժողովի պատգամավոր, «Ազատ Հայրենիք» կուսակցության նախագահ Արայիկ Հարությունյանը զբաղեցրել է պետական նախարարի պաշտոնը (2017-2020)։
Արայիկ Հարությունյանը պատանդ է վերցվել և առևանգվել Բաքու Ադրբեջանի իշխանությունների կողմից 2023 թվականի հոկտեմբերի 3-ին։
Դավիթ Մանուկյանը գեներալ-մայորի կոչումով հայ զինվորական է։
Դավիթ Մանուկյանը ծնվել է 1971 թվականի հոկտեմբերի 15-ին Ջերմուկում (Հայկական ԽՍՀ) (ԽՍՀՄ)։ ՀՀ զինված ուժերում և Արցախի Հանրապետության (Լեռնային Ղարաբաղի) Հանրապետության պաշտպանության բանակում (1992-2022) զբաղեցրել է տարբեր զինվորական պաշտոններ։ Որպես Արցախի պաշտպանության բանակի նախկին առաջին հրամանատարի տեղակալ՝ նա թոշակի է անցել զինվորական ծառայությունից 2022 թվականին։
Դավիթ Մանուկյանը առևանգվել է 2023 թվականի սեպտեմբերի 27-ին Ադրբեջանի իշխանությունների կողմից՝ Արցախի այլ քաղաքացիների հետ Հայաստան մուտք գործելիս՝ Հակարիի կամրջի վրա գտնվող անօրինական անցակետում, որը Ադրբեջանի կողմից տեղադրվել էր Բերձորի (Լաչինի) միջանցքի անօրինական շրջափակումից հետո։
Լյովա (Լևոն) Մնացականյանը հայ զինվորական է, Պաշտպանության բանակի նախկին հրամանատար, Արցախի Հանրապետության (Լեռնային Ղարաբաղի) պաշտպանության նախարար (2015-2018) և գեներալ-լեյտենանտ։
Լևոն Մնացականյանը ծնվել է 1965 թվականի սեպտեմբերի 14-ին, Ստեփանակերտում, Լեռնային Ղարաբաղի ինքնավար մարզում (ԽՍՀՄ)։ Եղել է պաշտպանության բանակի հրամանատար և շտաբի պետի առաջին տեղակալ։ Լևոն Մնացականյանը 2023 թվականի սեպտեմբերի 29-ին առևանգվել է ադրբեջանական ուժերի կողմից Արցախի այլ քաղաքացիների հետ Հայաստան մուտք գործելիս՝ Հակարիի կամրջի վրա գտնվող անօրինական անցակետում, որը Ադրբեջանի կողմից տեղադրվել էր Բերձորի (Լաչինի) միջանցքի անօրինական շրջափակումից հետո։
Բակո Սահակյանը հայ քաղաքական և պետական գործիչ է։ Սահակյանը Արցախի Հանրապետության (Լեռնային Ղարաբաղի) երրորդ և ամենաերկար պաշտոնավարած նախագահն է՝ 2007 հուլիսից մինչ 2020 մայիս։ Կրում է Հայաստանի զինված ուժերի գեներալ-մայորի կոչում։ Նա ծնվել է 1960 թվականի օգոստոսի 30-ին Ստեփանակերտում, Լեռնային Ղարաբաղի Ինքնավար Մարզում (ԽՍՀՄ): Արցախի Հանրապետության ներքին գործերի նախկին նախարար և Արցախի Հանրապետության ազգային անվտանգության ծառայության նախկին տնօրեն։
Բակո Սահակյանը առևանգվել է Ստեփանակերտում և 2023 թվականի հոկտեմբերի 3-ին ադրբեջանական ուժերի կողմից տեղափոխվել Բաքու։
Ռուբեն Վարդանյանը հայ գործարար, բարերար, հասարակական և քաղաքական գործիչ է։ Ծնվել է 1968 թվականի մայիսի 25-ին Երևանում, Հայկական ԽՍՀ (ԽՍՀՄ): 2022 թվականի նոյեմբերի 4-ից մինչև 2023 թվականի սեպտեմբերի 27-ը Վարդանյանը զբաղեցրել է Արցախի Հանրապետության (Լեռնային Ղարաբաղի) պետական նախարարի (վարչապետի) պաշտոնը։ Ռուբեն Վարդանյանը «Ավրորա» մարդասիրական նախաձեռնության համահիմնադիրն է։
Ռուբեն Վարդանյանը առևանգվել է Ադրբեջանի իշխանությունների կողմից 2023 թվականի սեպտեմբերի 27-ին, երբ նա, արցախցի այլ քաղաքացիների հետ, մտնում էր Հայաստան Հակարի կամրջի վրա գտնվող անօրինական անցակետով, որը տեղադրվել էր Ադրբեջանի կողմից Բերձորի (Լաչին) միջանցքի անօրինական շրջափակումից հետո։
Քաղաքացիական կալանավորներ
Մադաթ Բադայան
Ծնվել է 15 սեպտեմբեր 1952 թ
71 ամյա հովիվը 2023 թ սեպտեմբերի 19-ի հարձակումից հետո հայտարարված էր որպես անհետ կորած։ 2023 թ նոյեմբերի 2-ին Բաքուն հայտարարեց նրա կալանավորման մասին։
Ռաշիդ Բեգլարյան
Ծնվել է 2 նոյեմբեր 1962 թ
Կալանավորվել է 2023 թ օգոստոսի 1-ին, Արցախի ադրբեջանական պաշարման ընթացքում, երբ ոտքով անցնում էր Աղավնո գյուղով, որը նախորդ տարի անցել էր ադրբեջանական վերահսկողության տակ։
2024 թվականի հուլիսի 12-ին Բաքվի զինվորական դատարանում տեղի ունեցած ձևական դատավարության ժամանակ Բեգլարյանը մեղավոր է ճանաչվել 1990-ականների սկզբին Արցախյան առաջին պատերազմին մասնակցելու համար ռազմական հանցագործությունների մեջ և դատապարտվել 15 տարվա ազատազրկման։
Դավիթ Դավթյան
Ծնվել է 5 փետրվար 1993 թ
Մարդասիրական օժանդակության աշխատակիցն առևանգվել է (իր համախոհ Գևորգ Սուջյանի հետ) 2020 թ նոյեմբերի 11-ին (նոյեմբերի 9-ի եռակողմ հրադադարի մասին հայտարարությունից հետո) Արցախի Բերձոր-Շուշի ճանապարհին։
2021 թ հուլիսի 28-ին Բաքվի ծանր հանցագործությունների դատարանում տեղի ունեցած ձևական դատավարության ժամանակ Դավթյանն ու Սուջյանը դատապարտվել են լրտեսության մեջ և դատապարտվել 15 տարվա ազատազրկման։
Վիգէն Էօլճեքճեան
Ծնվել է 12 հուլիս 1979 թ
2020 թ նոյեմբերի 10-ին, 2020 թ պատերազմի հրադադարի ուժի մեջ մտնելուց ժամեր անց, լիբանանում ծնված ՀՀ քաղաքացի Էօլճեքճեանն առևանգվել է Արցախի Շուշի քաղաքում իր հետ ճամփորդող լիբանանահայ ընկերոջ՝ Մարալ Նաջարյանի հետ։
2021 թ հունիսի 14-ին Յասամալի շրջանային դատարանում կայացած ձևական դատավարության ժամանակ Էուլջեքյանը մեղադրվոր է ճանաչվել ահաբեկիչ և վարձկան լինելու մեջ և դատապարտվել 20 տարվա ազատազրկման։
Գևորգ Սուջյան
Ծնվել է 21 հունվարի 1989 թ
Մարդասիրական օժանդակության աշխատակիցն առևանգվել է (իր համախոհ Դավիթ Դավթյանի հետ) 2020 թ նոյեմբերի 11-ին (նոյեմբերի 9-ի եռակողմ հրադադարի մասին հայտարարությունից հետո) Արցախի Բերձոր-Շուշի ճանապարհին։
2021 թ հուլիսի 28-ին Բաքվի ծանր հանցագործությունների դատարանում տեղի ունեցած ձևական դատավարության ժամանակ Սուջյանն ու Դավթյանը դատապարտվել են լրտեսության մեջ և դատապարտվել 15 տարվա ազատազրկման։
Վագիֆ Խաչատրյան
Ծնվել է 28 հոկտեմբեր 1955 թ
Կարմիր խաչի միջազգային կոմիտեի կողմից Խաչատրյանին տարհանում էին Արցախից՝ ՀՀ-ում շտապ բուժօգնություն ստանալու նպատակով, երբ 2023 թվականի հուլիսի 29-ին ադրբեջանցի սահմանապահները նրան առևանգեցին Լաչինի միջանցքի անցակետից։
Նրա ձևական դատավարությունը իրականացվել է Յասամալի շրջանային դատարանում՝ Բաքվի ռազմական դատարանի դատավոր Ջամալ Ռամազանովի նախագահությամբ, 2023 թ հոկտեմբերի 13-ին, որտեղ նրան անհիմն մեղադրանք է առաջադրվել 1990-ականներին Արցախյան առաջին պատերազմի ժամանակ Խոջալուի շրջանի Մեշալի գյուղում «ցեղասպանություն» կատարելու մեջ։ Նոյեմբերի 7-ին նա դատապարտվել է 15 տարվա ազատազրկման։ Հետագա բողոքարկումը մերժվել է։
Ռազմագերիներ
Դավիթ Ալավերդյան
Տարիք՝ 36 տ
Ձերբակալման ժամանակ՝ սեպտեմբեր 2023 թ
Ձերբակալման վայր՝ Արցախ
Լևոն Բալայան
Տարիք՝ 46 տ
Ձերբակալման ժամանակ՝ սեպտեմբեր 2023 թ Ձերբակալման վայր՝ Արցախ
Վասիլի Բեգլարյան
Տարիք՝ 31 տ
Ձերբակալման ժամանակ՝ սեպտեմբեր 2023 թ Ձերբակալման վայր՝ Արցախ
Էրիկ Ղազարյան
Տարիք՝ 39 տ
Ձերբակալման ժամանակ՝ սեպտեմբեր 2023 թ
Ձերբակալման վայր՝ Արցախ
Ալյոշա Խոսրովյան
Տարիք՝ 56 տ
Ձերբակալման ժամանակ՝ 3 հոկտեմբեր 2020 թ
Ձերբակալման վայր՝ Արցախ
Նրա (և Լյուդվիգ Մկրտչյանի) ձևական դատավարությունը տեղի է ունեցել 2021 թ հունիսին Յասամալի շրջանային դատարանի վարչական շենքում։ Խոսրովյանը դատապարտվել է 1990-ականներին Արցախյան առաջին պատերազմի ժամանակ գերեվարված ադրբեջանցի պատանդներին խոշտանգելու մեղադրանքով և 2021 թ օգոստոսի 2-ին դատապարտվել 20 տարվա ազատազրկման։
Գարիկ Մարտիրոսյան
Տարիք՝ 52 տ
Ձերբակալման ժամանակ՝ սեպտեմբեր 2023 թ
Ձերբակալման վայր՝ Արցախ
Լյուդվիգ Մկրտչյան
Տարիք՝ 54 տ
Ձերբակալման ժամանակ 20 հոկտեմբեր 2020թ
Ձերբակալման վայր՝ Արցախ
Նրա (և Ալյոշա Խսորովյանի) ձևական դատավարությունը տեղի է ունեցել 2021 թ հունիսին Յասամալի շրջանային դատարանի վարչական շենքում։ Մկրտչյանը դատապարտվել է 1990-ականներին Արցախյան առաջին պատերազմի ժամանակ գերեվարված ադրբեջանցի պատանդներին խոշտանգելու մեղադրանքով և 2021 թ օգոստոսի 2-ին դատապարտվել 20 տարվա ազատազրկման։
Մելիքսեթ Փաշայան
Տարիք՝ 53 տ
Ձերբակալման ժամանակ՝ սեպտեմբեր 2023թ
Ձերբակալման վայր՝ Արցախ
Գուրգեն Ստեփանյան
Տարիք՝ 37 տ
Ձերբակալման ժամանակ՝ սեպտեմբեր 2023թ
Ձերբակալման վայր՝ Արցախ
Իրավական և քաղաքական խնդիր՝ միջազգային ուշադրության կենտրոնում
Ադրբեջանը իրականացնում է ապօրինի կալանքներ, համակարգված խտրականություն է ցուցաբերում՝ հատկապես ազգությամբ հայ անձանց նկատմամբ, և խախտում է արդար դատաքննության իրավունքը։
Խնդիրն առնչվում է ոչ միայն առանձին դեպքերին։ Այն հարցականի տակ է դնում Ադրբեջանի՝ միջազգային կառույցների հանդեպ ստանձնած պարտավորությունների կատարումը։ Նախագահ Իլհամ Ալիևի երկարամյա իշխանության պայմաններում երկիրը բազմիցս քննադատության է արժանացել ընդդիմության նկատմամբ ճնշումների, անկախ մամուլի դեմ գործողությունների և դատարանների՝ որպես քաղաքական գործիք գործածման համար։
Հիմնական աղբյուր՝ azg.am